Jalaran ora dirumat kanthi becik, Tina mati pirang-pirang dina kepungkur. Tina dianggep nandang setrès berat utawa édan jalaran nganti umuré nem taunan luwih mung dipapanaké akan kamar ciut lan dipakani sego wungkusan tanpa lawuh. Ana kamar kang ukurané mung 1×2 mèter, Tina kangèlan obah. Banyu kanggo ngombé utawa wisuh uga ora ana.
Sanajan umuré wis nem taunan, Tina pancèn ora disekolahaké. Tanpa wong tuwa, saben dinané Tina urip karo Toni sing umuré sangang taun luwih tuwa. Tina lan Toni padha nglakoni sekolah alam, kaya déné home schooling. Gandhèng ora ana sing mbimbing, mula sinauné mung saka wong-wong sing isih gelem nyambangi dhèwèké. Mula ora mokal, yèn kelakuané Toni luwih wasis udud klepas-klepus tinimbang liyané.
Ora mung Tina sing setrès, Toni uga padha waé nasibé. Dhèwèké sakloron ora duwé dolanan kanggo ngudhari sumpeg lan bosené marang kahanan. Tina, uga naté dipergoki njeblès-jeblèsaké endhasé ana témbok kamaré. Déné Toni, saking setrèsé uga kerep mutahaké apa sing dipangan, banjur dijupuk lan diuntal manèh.
“Gangguan kejiwaané Tina lan Toni padha persis karo sing dialami manungsa lumrah. Tina lan Toni duwé DNA sing 97,3 persèn persis karo manungsa,” ujaré Seto Wibowo, Captivity Program Coordinator dari Centre for Orangutan Protection (COP), yaiku LSM kang nggethu ngurus perlindungan Orangutan kaya Tina lan Toni iku.
Seto sakanca neliti ana ing limang bonbin sa-Indonésia, salah sawijiné ya bonbin Jurug iku. Telung dina suwéné nggatèkaké kelakuan Orangutan, saben ésuk, awan lan soré. Saliyané setrès amarga kahanan, Tina lan Toni uga kurang gizi utawa malnutrisi, mula awaké ora seger kaya samesthiné.
Sejatiné, COP wis mènèhi priksa marang para pangulawenthah bonbin iku. Malah, COP sanggup nanggung biaya kanggo nylametaké Tina lan Toni kanthi nggawé papan kang becik ana Jurug kana. Émané, COP rumangsa disepèlèkaké déning salah sawijiné Kepala Dinas. “Matiné Tina jalaran saka sikapé Bu Weni Ekayanti sing ora gelem dibiyantu,” mangkono pernyataan resminé COP.
Dina-dina iki, Toni mesthi waé tambah setrès jalaran kudu urip ijèn. Arep tilik mbah buyuté ana satengahé alas Kalimantan kana, mesthi ya ora bakal bisa. Kamangka, kéwan sing jenengé ilmiyahé Pongo Pygmaeus iku cacahé sansaya sithik. Mbiyèn, Pongo-Pongo saka mBornéo iku malah tau moncèr dadi tontonan larang ing Thailand kana.
Kanca-kancané Tony sing awaké gedhé-gedhé lan prakosa iku diajari tinju. Mbiyèné, Pongo-Pongo iku dislundupaké menyang mBangkok awit isih bayi, banjur diopèni nganti gedhé. Bareng gedhé, yan mangkono iku: ora disekolaké ana SD nanging malah diwuruki gelut banjur kanggo tontonan sing dikarciské. Percaya kena, ora uga kena, kabar-kaburé usaha tontonan tinju Orangutan iku diduwèni bekas Perdana Menteri Thailand dhéwé, yaiku Thaksin Sinawatra.
Tur manèh, bisnis kuwi raméné uga wektu Pak Thaksin dadi panguwasa negara kana. Mula, para aktivis lingkungan lan perlindungan kéwan ora bisa nembus ana kana, apa manèh njaluk baliné Orangutan kuwi mlebu Indonésia manèh.
Related posts:
o o tak kiro tina tenanan, banjure tina bon-bin
[...] utawa favorit, embuh uripé, embuh kahanan matiné. Tur manèh, ana uga sing prigel èkspor Orangutan (Pongo Pygmaeus), yaiku kewan langka saka mBornéo menyang negara manca. Malah, Orangutan sing [...]
[...] utawa favorit, embuh uripé, embuh kahanan matiné. Tur manèh, ana uga sing prigel èkspor Orangutan (Pongo Pygmaeus), yaiku kewan langka saka mBornéo menyang negara manca. Malah, Orangutan sing [...]